[Thanks be to God whose faithful love.]

1 BOOISE gys yn Jee dy ghraih dy brâ,
Nyn Mraar ass seaghyn t’er livrey;
Gys boggey flaunyss er chaghlaa,
‘Sy boayl dy vaynrys, nish ec fea.

2 Jeant aarloo son yn fouyr gloyroil,
Hoshiaght veih peccah er ny niee:
Eisht haink yn chaghter feer gherjoil,
Lhig raad da’n annym, seose gys Jee.

3 T’eh neesht er chaggey’n caggey mie,
Lesh boggey cheayll eh yn coraa,
"Ta dt’obbyr jeant, tar seose hym thie,
Marish dty Hiarn er son dy brâ."

4 Seose gys ny cummallyn ‘syn aer,
T’eh gardit lesh ec flaunyssee;
Ayns oghrish ABRAHAM e ayr,
As seyr veih baase ayns fenish Yee.

5 Booise gys yn Jee graysoil trooid Creest,
Quoi ren nyn garrey y hauail;
" Dy mie t’ayd jeant," jean gra rhyms neesht,
Lesh boggey lhig dou eisht paartail.

6 Eisht lhig dooin caggey myr nyn mraar,
As goaill yn attey lesh tranlaase,
Streeu gys ny cummallyn ‘syn aer,
As goaill yn leagh gloyroil ec baase.

7 Nee’n briw cairagh, coyrt un laa
Yn attey daue ta shirrey nish,
Lesh foddeeaght ta goaill jurnaa,
Gys hig nyu garrey graihagh rish.

8 Nee’n Chiarn, my creeaghyn ain ta gra,
Yn yeearree jeayn ta ain chooilleen;
Ny smoo ny oddys ‘nane gimraa,
As jannoo neesht slane maynrey j’in.

9 Hee mayd yn yea cheet rish un laa,
Yn vea ain follit ayns y Chiarn;
Nee’n joan ain clashtyn yn coraa.
As troggal seose ec feiyr yn chayrn;

10 Quoi oddys gymmyrkey yn treisht!
Cha maynrey te dy smooinaghtyn
Dy bee mayd cooidjagh troggit seose,
Quail Yeesey ayns ny bodjallyn!

11 Beaynid ayns shilley, shassoo magh,
Myr faarkey mooar fegooish combaase;
Jeh’n seihll dy hoilshey nish t’ain baght,
Beaynid nagh jean ny skyrrey gaase!

12 Son pooaryn niau ta nish cheet hooin,
Goaill ayrn jeh boggey flaunyssee;
Agh beaynid hene ta kiarit dooin,
Beaynid dy ghraih heose marish Jee.