[ Extended on a cursed tree.]

1 TREINIT gys billey'r Calvary;
Coodit lesh ollish as lesh fuill;
O jeeagh er Ree dy chooilley Ree!
Crommey gys baase ta’n Jee graysoil.

2 Quoi Hiarn, t’er n’yannoo’n obbyr shen !
Quoi ren dty chorp gloyroil y vroo?
Dty chree veih loght dy kinjagh glen,
Chamoo va foalsaght ayns dty ghoo.

3 She mish, eer mish t’er nirree dt’oi,
Hug oo gys seaghyn t’erskyn goan,
Hug er dty uill smoo deyr dy roie,
Yn chrown dy ghrine chur er dty chione,

4 Yn Ree dy ghloyr cre vel eh nish?
Yn Mac gloyroil jeh lheid yn stayd,
E oaie lesh trimshey croghey sheese,
As neesht gannooinagh fo yn laad.

5 She fo my laad hur oo yn baase,
Mish ren dty choyrt gys wheesh dy gheir,
Ren cur ort geam lesh wheesh d’angaish:
As marroo Mac smoo deyr yn Ayr.

6 Eayn Yee smoo graihagh as gloyroil,
S’graihagh er peccee ta dty chree
Cooin lhiam dy ennaght bree dty uill,
Dty ghraih ayns baase ren kionnaght mee.

7 She mish va treigit, boght, as faase,
My lhie ayns beeal yn lion dewil,
Uss, lheim ayns cabbyn gyere y vaaish,
Dy my livrey veih pooar yn jouyl.

8 Cur dooys dy ennaghtyn dty phian,
Goaill bine jeh’n chappan sharroo neesht,
Gymmyrkey’n chrosh mayrt hene yn Eayn,
As ayrn ye aym ayns surranse Chreest.

9 Haualtagh graihagh cooin uss lhiam,
Yn currym t’orrym y chooilleen,
Dy vod dy chooiiley nhee ta aym,
Ye baarit gys yn gloyr ayd hene.

10 O lhig dty osnaghyn as jeir,
Kinjagh cur er my hooillyn roie;
Derrey veem troggit seose ‘syn aer,
As mayit ayns yrjey gloyr ny hoie !